Skip Ribbon Commands
Skip to main content

Contact

  • +27 21 950 2548
Back

Email

Skip Navigation LinksMedia Centre
 

Gebruik Jou Uitkeerpolis om Jou Aftrede te Help Befonds

7 Maart 2019

Ons het Bennie Wessels, Produkaktuaris by Sanlam, uitgevra oor die waardevolle rol wat ’n uitkeerpolis in jou aftreeportefeulje kan speel.

Kortliks, wat is ’n Uitkeerpolis?

Dis ’n beleggingskontrak by ’n lewensversekeraar, wat gewoonlik in die eerste vyf jaar beperkte toegang tot kapitaal bied. Dit moedig spaardissipline oor die medium tot lang termyn aan. Dit bied ook aantreklike potensiële belastingvoordele vir sommige kliënte. In ’n uitkeerpolis betaal die lewensversekeraar namens jou belasting teen ’n koers van 30% op inkomste en 12% op kapitaalwins. Dit is belastingdoeltreffend vir enige kliënt met ’n marginale belastingkoers bo 30%. Indien jy ’n welvarende persoon is en daardie geld in jou eie hande sou belê, sou jy waarskynlik reeds jou rente- en kapitaalwinsvrystellings gebruik het, en ’n hoë inkomste verdien wat teen ’n marginale koers van meer as 30% belas word. Dit het dus ’n duidelike belastingvoordeel vir die regte belegger.

Watter Unieke Waarde Bied ’n Uitkeerpolis oor die Langtermyn?

Uitkeerpolisse is nie aan batetoewysingsperke onderhewig nie. Hulle laat jou toe om byvoorbeeld 100% in aandele of 100% in die buiteland te belê. Daarenteen is uittree-annuïteite (UA’s) en bewaringsfondse onderhewig aan Regulasie 28 van die Wet op Pensioenfondse, wat perke plaas op hoeveel hierdie aftreeprodukte in sekere bateklasse mag belê. Daarom sal jy miskien ’n uitkeerpolis by jou portefeulje wil insluit om groter blootstelling aan ’n aggressiewe beleggingstrategie te verkry.

Hoe kan Jy ’n Uitkeerpolis Gebruik om Jou Aftreedoelwitte te Verwesenlik?

’n UA behoort jou eerste keuse te wees, gevolg deur ’n belastingvrye spaarproduk as jou tweede keuse, om vir aftrede te spaar. Wanneer jy egter tot die maksimum perke in hierdie produkte belê het, kan ’n uitkeerpolis jou volgende opsie wees. Jy kan ’n uitkeerpolis gebruik om ’n enkelbedrag te spaar en gereelde onttrekkings hieruit aan te gaan om jou aftree-inkomste aan te vul. Hierdie onttrekkings is tans belastingvry in jou hande.

Daar’s ’n Persepsie dat Uitkeerpolisse Duur is. Is dit Waar?

Dit kan voortspruit uit die feit dat mense dikwels hul uitkeerpolisse vroeg beëindig en dan duur beëindigingskoste aangaan. As jy egter jou uitkeerpolis vir die kontraktuele termyn volhou, sal hierdie koste nie van toepassing wees nie. Tradisioneel was die kontraktermyne van uitkeerpolisse 10 tot 15 jaar. Dit is onlangs verminder tot vyf jaar op die meeste uitkeerpolisse. Op ’n Sanlam-uitkeerpolis met herhalende premies geld die beëindigingskoste slegs vir die eerste twee jaar, wat help om die waarde vir geld te verbeter indien jy van jaar drie af die polis beëindig.

Mense vergeet ook dat uitkeervoordele op ’n uitkeerpolis belastingvry is. Hulle kry dus nabelaste opbrengste. Wanneer jy dit met die opbrengste van ander produkte vergelyk, soos effektetrusts en bankrekeninge, moet jy die belastingverskil in ag neem.

Hoe kan Kliënte die Beste Uitkeerpolis Kies?

Die meeste lewensversekeraars bied uitkeerpolisse met ’n verskeidenheid onderliggende fondse waaruit kliënte kan kies. Sanlam se uitkeerpolisse bied jou tipies keuses van beide interne en eksterne bestuurde fondse, asook fondse met onderliggende waarborge. Benewens die evaluering van die onderliggende fondskeuses, vergelyk ook voordele soos lojaliteitsbonusse, en doen ’n kostevergelyking deur die effektiewe jaarlikse koste- oftewel EJK-maatstaf te gebruik. Dit is ook raadsaam om kundige leiding by ’n finansiële adviseur te kry.

Sanlam Life Insurance is a licensed financial service provider.
Copyright © Sanlam