Skip Ribbon Commands
Skip to main content

Contact

  • +27 21 950 2548
Back

Email

Skip Navigation LinksMedia Centre
 

Moet ek my lewensversekeringspolis na aftrede behou?

7 Maart 2019

Volgens Petrie Marx, Produkaktuaris by Sanlam Individuele Lewens, is daar ’n wanopvatting in die mark dat lewensversekering nie meer nodig is wanneer jy aftree nie. Ons het hom gevra om meer insig te gee in hierdie belangrike onderwerp.

Het Ek nog Lewensversekering Nodig, as ’n Afgetredene wat van My Aftreespaargeld Leef?

Lewensversekering kan in baie gevalle waardevolle beskerming bied. Byvoorbeeld, as jy nog skuld het wanneer jy die dag aftree, kan lewensversekering dit dek indien jy sterf. En met begrafnisdekking in plek, sal jy nie jou gesin met begrafniskoste belas nie.

Lewensversekering is ook nuttig vir afgetrede pare wat ’n sogenaamde “vaste pensioen” kry. Die waarde van hierdie tipe polis kan afneem wanneer een gade sterf – en lewensdekking kan gebruik word om die agterblywende gade se verlies aan inkomste aan te vul.

En lewensversekering kan natuurlik ook groot waarde voeg by jou finansiële nalatenskap aan jou geliefdes.

Wanneer is dit Wys om Lewensversekering ná Aftrede te Hou?

Indien jy ’n uitgebreide familiestruktuur het wat verskeie generasies insluit, sal jy gedurende jou aftrede miskien nog afhanklikes hê. Jy kan tot na jou dood vir hierdie geliefdes voorsiening maak deur jou lewensversekering in stand te hou.

Andersins wil jy miskien ook voorbereid wees op die moontlikheid dat jy later in jou aftrede deurlopende sorg nodig sal hê weens ’n ernstige siekte soos Alzheimers of demensie. Die beste manier om in ons mark hiervoor voorsiening te maak, is om jou dekking vir gevreesde en ernstige siektes in stand te hou.

Kan Lewensversekering met Boedelbeplanning Help?

Lewensversekering is ’n belangrike hulpmiddel in boedelbeplanning, en dit is ’n belangrike rede waarom baie mense hul polisse gedurende aftrede voortsit. Hoewel dit goed is om begunstigdes vir jou lewensversekering te benoem, kan jy ook lewensdekking hê waarvoor jy nie ’n begunstigde benoem nie. Hierdie deel van beskikbare fondse kan gebruik word om likiditeit in jou boedel te skep, wat die nodige belasting en verpligtinge kan dek. Dit kan help dat jou boedel vinniger afgehandel word en verhoed dat jou geliefdes bates moet verkoop om hierdie koste te dek.

Kan Ek My Lewensversekering Herstruktureer om by die Aftreefase van My Lewe te Pas?

Ja, beslis – baie van die produkte wat vandag beskikbaar is, is baie buigsaam. Jy sal miskien jou ongeskiktheidsversekering wil kanselleer, aangesien jy nie meer ’n inkomste uit ’n beroep verdien nie; of oorweeg om jou jaarlikse outomatiese dekkingverhogings te verminder.

Op die ou end is dit die beste om met ’n finansiële adviseur te gesels, wat jou deur hierdie proses kan lei en kan seker maak dat jy genoeg lewensdekking in plek het, met premies wat bekostigbaar is in hierdie lewensfase.

Sanlam Life Insurance is a licensed financial service provider.
Copyright © Sanlam