Hoe kan jy seker maak dat jy steeds genoeg vir jou aftrede spaar?

• Handhaaf ’n spaargewoonte
  Dit kan jou finansiële posisie in die toekoms versterk wanneer jy aftree, of jou selfs in staat stel om vroeër as wat jy beplan het af te tree. Hoe meer jy vandag spaar, hoe groter kan jou bestedingsvermoë gedurende aftrede wees.


• Verstaan die kenmerke en voordele van jou aftreeproduk
  As jy weet wat jy nou het, sal dit jou help om ’n ingeligte keuse oor jou belegging te maak. Byvoorbeeld:
  • Hoe minder belasting jy betaal, hoe meer geld het jy oor om te spaar. Om vir belastingverligting te kwalifiseer, moet jy egter in die regte tipe beleggingsproduk belê. Met produkte wat aan aftreewetgewing onderhewig is, soos ’n UA of jou werkgewer se aftreefonds, kan jy nou tot 27.5% van jou jaarlikse inkomste (onderhewig aan ’n jaarlikse perk van R350 000) belê en belastingverligting op hierdie bydraes kry.
  • Beëindigingskoste: jy sal miskien in die versoeking kom om jou huidige aftreeproduk te verander. Dit kan jou aan beëindigingskoste blootstel wat lank kan neem om te verhaal – in baie gevalle sal jy dit miskien nooit verhaal nie.
  • Risikovoordele verbonde aan jou produk: indien jou aftreeproduk risikovoordele insluit, sal jy enige lewens-, ongeskiktheids- of gevreesde siektedekking verloor, wat duurder kan wees om te vervang.
• Kry professionele hulp
  Dit is belangrik om ’n professionele finansiële beplanner te raadpleeg wat jou sal help om jou behoeftes te bepaal, en ’n volledige finansiële plan sal saamstel wat op jou unieke omstandighede gegrond is. Net so belangrik is die gesonde advies wat jy sal ontvang om jou te help rekening hou met die belastingwette waaraan aftreeprodukte onderhewig is – voor sowel as na aftrede.


• Bewaar jou geld
  Wanneer jy van werkgewer verander, sal jy miskien in die versoeking kom om al jou spaargeld in kontant te laat uitbetaal, maar onthou die belasting! Boonop is dit reeds moeilik om genoeg vir aftrede te spaar. As jy ’n hap uit jou spaargeld neem, sal dit jou ’n beduidende agterstand gee.
  
  Wat moet jy dan met jou geakkumuleerde spaargeld doen? Jy het drie opsies:
  • dra dit oor na jou bestaande UA,
  • dra dit oor na ’n bewaringsfonds, of
  • dra dit oor na jou nuwe werkgewer se fonds.

Met ’n oordrag na hetsy ’n UA of ’n bewaringsfonds betaal jy geen belasting nie, en kan jy voortgaan om jou spaargeld te laat groei.