Skip Ribbon Commands
Skip to main content

Contact

  • +27 21 950 2548
Back

Email

Skip Navigation LinksMedia Centre
 

Waar Lê Krag?

8 Junie 2020

In krisistye is dit heeltemal normaal om gespanne, verward of beangs te voel. As jy nie emosioneel effens verlore voel tydens die krisis wat jy beleef nie, besef jy dalk nog nie ten volle die werklikheid van die situasie nie. Hierdie gevoelens beteken nie dat jy swak is nie, maar gee jou die geleentheid om sterk te wees. Jou optrede tydens en ná ’n krisis bepaal jou krag.

Dit is maklik om toe te gee aan primitiewe emosies van paniekbevange reaksie en irrasionele besluitneming. Maar, wanneer ons onsself tyd gee om diep na te dink, het ons beter toegang tot redenering en perspektief. Dit maak ons minder geneig tot roekelose en impulsiewe besluite.

Marcus Aurelius het eenkeer gesê, “Dit wat in die pad staan, word die pad.”

Daar is geen manier om oor ’n krisis te kom nie; die enigste manier is om daardeur te kom. Ons is dikwels traag om te verander, maar die mens se grootste krag lê in sy vermoë om aan te pas.

Die uitdaging lê daarin om uit ons gemaksones te beweeg. Of dit nou die hele wêreld is wat in ’n toestand van veranderlikheid is, en of dit net jou onmiddellike situasie is wat in ’n krisistoestand is, jy is die enigste persoon wat jouself kan verander.

Hoe meer ons onsself aan ander roetines, gewoontes en omgewings blootstel, hoe gouer leer die brein om aan te pas sonder om paniekbevange te raak. Nadat die nuwe roetine genoeg kere gevolg is, sal dit minder inspanning verg en die verstekpatroon word.

Dit is ook deur hierdie reis van aanpassing wat ons ons sterkpunte begin sien, en dit kan verskil van ons kwalifikasies, toekennings en ervaringe. Die identifisering van ons sterkpunte en die beweging na ruimtes waar ons daardie sterkpunte kan verken en gebruik, help ons om ’n meer vervulde lewe te begin lei. Alhoewel jou krisis dalk ’n einde gemaak het aan jou lewe soos jy dit geken het, kan dit ook ’n geleentheid wees om na ’n meer vervullende lewe te beweeg.

Ons moet dit ook oorweeg om die dinge wat aanpasbaar is, aan te pas. As ons geweldige stres ervaar oor iets wat buite ons beheer is, is dit nutteloos om tyd te bestee om dit te verander. Trouens, dit sal dalk die teenoorgestelde resultaat hê en ons meer gespanne maak. Ons kan vrede daarin vind om hierdie dinge te laat gaan, en dit is ’n ander sterkpunt wat ons kan ontwikkel.

Dit kan nogal irriterend wees wanneer mense te beskeie is oor hul prestasies. Ons mag hulle dalk wil skud en sê, “Kyk wat jy bereik het!” Maar dit is maklik om só vasgevang te word in ’n doelwit wat ons probeer bereik dat dit moeilik is om te sien hoe ver ons gekom het. Dit is een van die grootste slaggate van geleidelike aanpassing. As jy altyd kyk na waar jy kan wees, waardeer jy nie waar jy nou is nie.

As jy probeer aanpas, maar nie weet hoe nie, en as jy voel dat jy ’n paar roekelose, impulsiewe besluite geneem het, moet jy weet dat jy die krag het om te verander, die krag het om alles te bowe te kom en die krag het om dinge anders te doen.

Sanlam Life Insurance is a licensed financial service provider.
Copyright © Sanlam