Skip Ribbon Commands
Skip to main content

Contact

  • +27 21 950 2548
Back

Email

Skip Navigation LinksMedia Centre
 

​​​​​​​​​​​​​​​​​​​​Wanneer om ’n Persoonlike Lening aan te gaan

1 Junie 2018

Die lewe is vol kinkels, en ons is gewoonlik nie voorbereid as iets onverwags gebeur nie. Wanneer jy byvoorbeeld in ’n motorongeluk beland, jou nuwe onderneming suidwaarts beweeg of ’n geliefde hul werk verloor, is daar gewoonlik nie genoeg finansiële bronne om die skok te absorbeer nie!

Noodgevalle is een oorweging, maar terwyl ons deurentyd ’n gerieflike leefstyl nastreef, sukkel ons ook om alles by te bring, en veral om die duur items by ons begroting in te pas.

Piet van der Walt, hoof van Sanlam Persoonlike Lenings, sê die rol wat goed bestuurde krediet speel om individuele welvaart op te bou, blyk duidelik uit die Nasionale Kredietreguleerder se onlangse verslag, wat toon dat daar 23.27 miljoen verbruikers in Suid-Afrika is wat krediet gebruik. Wat egter kommerwekkend is, is dat meer as 10 miljoen van hierdie groep swak rekords het, sê Van der Walt.

Wanneer is krediet ’n verstandige keuse?

Daar is tye wanneer ’n persoonlike lening ’n goeie idee is. Trouens, dit kan soms jou enigste opsie wees, sê Van der Walt. “Hoewel ons nie aanbeveel dat jy skuld maak as jy dit kan verhelp nie, kan ’n persoonlike lening vinnig ’n oplossing bied as jy skielik kontant nodig het wanneer iets onverwags gebeur, soos ’n ongeluk of onbeplande mediese uitgawes – dit kan regtig tot jou redding kom in ’n krisis,” sê hy.

Behoeftes vs begeertes

Van der Walt sê indien die lening by ’n verantwoordelike uitlener verkry word, en onder leiding van ’n professionele finansiële adviseur aangewend word, kan ’n persoonlike lening ’n handige finansiële bestuursinstrument wees. “Dit moet nooit vir slegte skuld gebruik word nie – soos om dit te verkwis op ’n oorsese vakansie of jou dogter se troue. ’n Persoonlike lening moet verkieslik slegs aangegaan word om finansiële behoeftes te dek, nie begeertes nie.”

Afgesien van onvoorsiene noodgevalle, kan persoonlike lenings gebruik word vir:

  • Huisverbeterings – wat die waarde van jou eiendom sal opstoot
  • Onderrig – wat ’n belegging in jou of jou kinders se toekoms is
  • Om ’n motor te koop – waar ’n voertuig se ouderdom dit byvoorbeeld moeilik maak om voertuigfinansiering te bekom.

“Nog ’n belangrike doel waarvoor ’n persoonlike lening oorweeg kan word, is skuldkonsolidasie – om ou korttermynskulde met verskillende betalingstermyne en rentekoerse te kombineer in een, eenvoudige maandelikse betaling teen ’n vaste koers en oor ’n vaste termyn. Die gedagte is om saam met jou finansiële adviseur ’n plan uit te werk om jou skuld op so ’n manier te konsolideer dat jou maandelikse skuldvermindering deel uitmaak van ’n weldeurdagte begroting wat jou nog steeds die kontantvloei gee wat jy nodig het.”

Van der Walt sê dit is nooit ’n goeie idee om lewenspolisse of risikodekking te kanselleer, of om bydraes tot aftreespaarfondse te staak, wanneer jy ’n finansiële struikelblok teëkom nie. “Gebruik eerder ’n persoonlike lening wat jy oor ’n vasgestelde tydperk oor die kort termyn kan terugbetaal sonder om jou en jou gesin se finansiële beskerming prys te gee. Met ’n Sanlam Persoonlike Lening kan jy byvoorbeeld selfs die maandelikse betalings verhoog om die lening vinniger terug te betaal – daar is geen boetes hiervoor nie. Ongelukkig laat nie alle verskaffers dit toe nie, en daarom moet mense hul leningsvoorwaardes baie deeglik nagaan.”

Kredietkaart vs persoonlike lening

’n Persoonlike lening is ook dikwels ’n beter opsie as om op die plastiekkaart in jou beursie staat te maak om uit ’n finansiële verknorsing te kom. Die totale koste wat met die gebruik van ’n kredietkaart gepaardgaan, soos jaarlikse koste, rente- en transaksiefooie, is dikwels hoër as die koste om ’n persoonlike lening aan te gaan. Die gebruik van ’n kredietkaart is onbeperk, en as jy nie sterk finansiële selfdissipline het nie, sal jy nie noodwendig jou skuldvlakke verminder nie.

Van der Walt waarsku dat mense nie persoonlike lenings by gewetenlose woekeraars of mikro-uitleners moet aangaan wat geneig is om die maksimum rentekoerse oor die kort termyn te vra nie. “Dit is beter om ’n uitlener met ’n goeie naam te kies, wat mededingende verpersoonlikte rentekoerse aanbied, in plaas van ’n twyfelagtige uitlener wat hoë terugbetalings vra.”

Dit is uiters belangrik om van die begin af die regte finansiële advies te kry. As jy desperaat is en by verskillende krediteure om persoonlike lenings aansoek doen, sal dit op jou kredietrekord aangedui word en kan dit die indruk skep dat jy finansieel in die moeilikheid is en daarom ’n kredietrisiko is.

“Indien ’n persoonlike lening egter op verantwoordelike wyse aangewend word, kan dit jou help om ’n goeie kredietrekord op te bou, wat in die toekoms tot jou voordeel kan wees,” is Van der Walt se slotsom.

Sanlam Life Insurance is a licensed financial service provider.
Copyright © Sanlam