Skip Ribbon Commands
Skip to main content

Contact

  • +27 21 950 2548
Back

Email

Skip Navigation LinksMedia Centre
 

Wie Betaal die Verskil?

15 Oktober 2021

Om jou finansies in ’n mediese noodgeval te beskerm, kan gapingsdekking net so belangrik soos mediese dekking wees. Gapingsdekking kan beskou word as aanvullende mediese versekering wat bedoel is om die verskil (gaping) tussen wat ’n privaat dokter vra en wat jou mediese skema betaal, te dek.

Goeie gesondheidsorg is nie altyd geredelik verkrygbaar nie en word gou ’n duur ervaring. Baie mense wat polisse vir gesondheidsdekking het, aanvaar soms dat hulle meer dekking het as wat hul polis insluit. Hulle sit dan met rekeninge vir hoë tekorte en moet die verskil tussen die mediese dekkingskoers en die koste van die spesialis betaal.

Om aan ’n mediese skema te behoort, beteken nie dat jy ten volle vir alle behandelings gedek sal wees nie. Dis omdat verskaffers van mediese skemas elke jaar ’n basistarief vasstel wat vir alle prosedures gevra kan word en jou mediese skemaplan ’n persentasie van hierdie tarief betaal.

’n Goeie plan kan tot 300% betaal, maar baie spesialiste of privaat hospitale vra meer as 300%. Dit het dikwels ’n tekort tot gevolg wat gedek moet word. Indien ’n chirurg byvoorbeeld 350% van die basistarief vra en jou mediese skema dek 300%, sal jy ’n bykomende 50% moet opdok.

Wat is gapingsdekking?

Alhoewel klein bedrae gehanteer kan word as ’n situasie opduik wat nie dringend is nie, kan ’n ongeluk of ’n skielike siekte beteken dat jy nie genoeg tyd het om te spaar nie en dat jy ’n groot tekort moet dek. Gapingsdekking betaal daardie verskil sodat jy dit nie hoef te doen nie.

Jy kan gapingsdekking net uitneem as jy reeds aan ’n mediese skema behoort, maar gewoonlik is net een polis nodig om ’n lid en hul afhanklikes te dek (solank almal op dieselfde skema en dieselfde opsie is). Dit kan dus baie bekostigbaar wees as jy ’n paar afhanklikes het.

Wat is gedek?

Alhoewel premies steeds betreklik goedkoop en voordele omvattend kan wees, is tye besig om te verander wat gapingsdekking betref. Dit is dus belangrik om te weet presies wat gedek is. Oor die jare het die media berig dat die verskaffers van gapingsdekking hul uitgawes moes besnoei ten einde finansieel lewensvatbaar te wees ondanks stygende privaat gesondheidsorgkostes. Op stuk van sake word versekeringskemas vir wins bedryf, en gapingsdekking is ’n versekeringsproduk wat aan die regulasies van die Korttermyn- en Langtermynversekeringswette onderworpe is eerder as aan dié van die Wet op Mediese Skemas van 1998.

Gapingsdekking word gebruik om die verskil te betaal tussen wat jou mediese skema betaal en jou totale mediese rekening, wat beteken dat selfs al het jy die goedkoopste hospitaalplan, jy ten volle gedek sou wees as jy gapingsdekking het.

Dit beteken egter ook dat die verskaffers van gapingsdekking, en nie mediese skemas nie, dikwels vir die grootste gedeelte van mediese kostes aanspreeklik is. Dit is bekend dat hierdie verskaffers tot 80% van kostes dra, en sulke groot tekorte beteken dat volle gapingsdekkingbetaling dikwels op lang termyn nie meer volhoubaar is nie.

Gevolglik het baie verskaffers van gapingsdekking ’n nuwe stelsel (“MatchPay”) ingebring wat op jou mediese skema gebaseer is en waarvolgens hulle bereken hoeveel van die bybetaling hulle sal dek.

In die lig van al die uitsluitings en nuwe berekeninge is dit belangrik dat jy goed verstaan wat jou mediese skema dek en hoe jou gapingsdekking daarvolgens werk. As jy enige gesondheidsprobleme het, wil jy jou regtig nie bekommer oor of jy dit kan bekostig om die nodige hulp te kry nie. Dit is dus raadsaam om so omvattend moontlik gedek te wees wanneer dit by mediese behandeling in Suid-Afrika kom. Moenie huiwer om ’n afspraak te reël as jy graag die bekostigbaarheid (of nie) van ’n gapingsdekkingplan vir jou gesin wil bespreek nie.

Sanlam Life Insurance is a licensed financial service provider.
Copyright © Sanlam